Merkel ta yi alkawarin ba wa Jordan karin rancen dala miliyan 100, kasar da gangamin adawa da matakan tsuke bakin aljihun gwamnati ya tilasta fraiminista yin murabus a farkon wannan wata na Juni.

A jawabinta ga daliban jami'ar Jamus da ke Jordan a kusa da birnin Amman, Merkel ta ce har yanzu Jamus ce kasar da ke maraba da 'yan gudun hijira da da baki 'yan kasashen waje;

" Ina ganin bai kamata ku ji tsoro ba. Dole ne wasu su fadi abunda bai kamata ba dangane da batun 'yan gudun hijira, sai dai hakan zai iya faruwa a ko'ina. Amma a dunkule zan iya alfaharin cewar, babu kasa kamar Jamus idan aka zo batun kare lafiyar 'yan gudun hijira, duk da cewar a wasu lokuta sun fuskanci zargi da ma kai musu hari, har da kisan gilla ga 'yan mata 'yan gudun hijira". 

Ziyarar ta yini biyu ta Merkel a yankin Gabas ta Tsakiya, na zuwa ne a daidai lokacin da rigingimu kan batun karbar 'yan gudun hijira ke kara ta'azzara a siyasar cikin gida na Jamus.