Rahotanni daga Amirka na cewar za a fara sauraron ba'asin wasu manyan jami'an diflomassiyar Amirka wadanda suka hada da William Taylor wanda yanzu yake aiki a ofishin jakadancin Amirka a kasar Ukraine da kuma George Kent da ke zaman mukaddashin sakatare mai kula da huldar Amirka da kasashen Turai.

Zaman na wannan rana dai zai mayar da hankali ne wajen jin ta bakin Mr. Taylor da Mr. Kent dangane da zargin da ake yi wa shugaban na Amirka wajen amfani da manufofi na kasashen waje don cimma burinsa na siyasa gabannin zaben shugaban kasa a shekarar 2020.