Kasar Mali ce dai ta fara bude kofar yin juyin mulki, inda sojoji suka kifar da gwamnati har sau biyu a cikin kasa da shekaru biyu. Bayan da sojojin Malin suka tsaga suka ga jini, sai takwarorinsu na Guinea Conakry da Burkina Faso suka biyo baya. Ba a jima ba kuma, suma takwarorinsu na Guine Bisau suka yunkura domin ganin sun kwace gwamnatin. Sai dai kuma yunkurin na sojojin Guinea Bisau ya ci tura, domin kuwa ba su samu nasarar kifar da gwamnatin Shugaba Umaro Sissoco Embalo ba.

Wannan matsala dai na kara kamari a Afirka ta Yamma, duk kuwa da kokarin da kungiyar Bunkasa Tattalin Arzikin Yankin wato ECOWAS ko CEDEAO ke yi na hukunta sojojin da suka kifar da gwamnati ta hanyar kakaba musu takunkumi. Koda a Alhamis din wannan makon ma, shugabannin kasashen kungiyar ta ECOWAS ko CEDEAO sun gudanar da taron gaggawa a Accra fadar gwamnatin kasar Ghana domin nemo mafita kan yawaitar juyin mulkin da ke neman zamewa yankin karfen kafa.