1. Tsallake zuwa shafin jadawali
  2. Tsallake zuwa jadawalin abubuwan da shiri ya kunsa
  3. Tsallake zuwa karin wasu shafukan DW

Kisan kare dangi a Sudan ta Kudu

Mohammad Nasiru Awal
December 1, 2016

Hukumar kare hakin dan Adam ta Majalisar Dinkin Duniya ta ce ana aikata kisan tsabtace kabila a Sudan ta Kudu.

Südsudan Flüchtlinge
Yara da mata da tsofaffi suka fi fuskantar kisan gillaHoto: picture-alliance/AP Photo/S. Wandera

Shugabar hukumar kare hakin dan Adam ta Majalisar Dinkin Duniya a Sudan ta Kudu Yasmin Sooka ta fada a cikin wata sanarwa cewa an aikata ko kuma ana ci gaba da aikata kisan tsabtace kabila a wasu yankuna na kasar abinda ke nuni da yiwuwar maimaita irin kisan kiyashi da ya auku a kasar Ruwanda a 1994, lokacin da aka kashe mutane kimanin dubu 800. Jami'ar ta nunar da haka ne a karshen ziyarar kwanaki 10 a Sudan ta Kudu. Ta ce matsananciyar yunwa da yi wa mata fyade cikin gungu da kone kauyuka sun zama ruwan dare a wasu yankuna na kasar. Sai dai shugaban Sudan ta Kudu Salva Kiir ya musanta zargin na MDD yana mai cewa babu irin wannan abu na kisan tsabtace kabila a Sudan ta Kudu. Kasar dai ta shafe kusan duk tsawon gajeren tarihinta cikin yakin basasa. A shekarar 2011 ta samu 'yancin kai amma gaba tsakanin shugaban kasa da mataimakinsa ta kunno kai a karshen 2013, abinda ya haddasa rikicin da ya ki ci ya ki cinyewa.

Tsallake zuwa bangare na gaba Babban labarin DW

Babban labarin DW

Tsallake zuwa bangare na gaba Karin labarai daga DW