Koriya ta Arewa da sake yin gwajin makami
January 27, 2022![Südkorea Taechon | Stinger Rakete wird abgefeuert](https://static.dw.com/image/60561557_800.webp)
Dama dai Koriya ta Arewa ta yi barazanar sake yin gwajin makami mai linzami. Sai dai rabon ta yi gwajin makamai masu yawa a cikin wata guda tun shekarar 2019, bayan wargajewar tattaunawar tsakanin shugabanta Kim Jong Un da shugaban Amirka na wancan lokaci Donald Trump.
Wannan jerin gwaje-gwajen makamai da aka haramta ya haifar da tofin Allah tsine a duniya yayin wani taron sirri da kwamitin sulhu na Majalisar Dinkin Duniya ya gudanar. Ita ma Amirka ta kakaba wasu sabbin takunkumai a matsayin martani, lamarin da ya harzuka Koriya ta Arewa.
Wadannan gwaje-gwajen makaman sun zo ne a wani yanayi mai sarkakiya a yankin, inda babbar kawar Koriya ta Arewa wato Chaina ke shirin karbar bakuncin gasar Olympics na lokacin sanyi a watan Fabrairu, yayin da Koriya ta Kudu na gudanar da zaben shugaban kasa a watan Maris.