Barazanar Koriya ta Arewa na wannan Lahadi, na zuwa ne daidai lokacin da wasu jiragen ruwa na kasar Japan biyu ke wani atisaye da jiragen yakin Amirka a yankin yammacin Pacific. Shugaba Donald Trump ya bayar da umarnin wasu manyan jiragen kasar su keta gabar ruwan yankin na Koriya, a martaninta kan yunkurin Koriya ta Arewa na gwada makaman nukiliya da masu linzami.

Ba a dai bayyana takamaiman wuraren da Amirkar ke hari ba a yankin, sai dai kalaman mataimakin shugaban Amirka a jiya Asabar na cewa nan ba da jimawa ba ne jiragen za su isa.

Koriya ta Arewar ta kuma kama wani dan kasar Amirka da ke kokarin ficewa daga kasar a wannan Lahadin, bayan kasancewar wasu Amirkawan biyu da ke tsare tun farko.