A rikicin da ake ci gaba da yi a gabacin Ukraine, Rasha ta zargi sojojin Ukraine da amfani da haramtattun makamai a kan 'yan aware. A saboda haka ministan harkokin wajen Rasha Sergei Lavrov ya yi kira da gudanar da bincike kan zargin amfani da wasu bama-bamai da duniya ta haramta amfani da su wanda aka yi a gabacin Ukraine. A kuma halin da ake ciki babban sakataren kungiyar tsaro da hadin kai a Turai Lamberto Zannier ya yi kira ga dukkan bangarorin da ke rikici a Ukraine da su tsagaita bude wuta. Sai dai kuma yayin wannan kira an samu labarin gwabza kazamin fada tsakanin sojojin gwamnati da 'yan aware masu goyon bayan Rasha a gabacin Ukraine. Akalla mutane uku aka yi wa rauni a wata musayar wuta kusa da Luhansk.

Mawallafi: Mohammad Nasiru Awal
Edita: Suleiman Babayo