Wata kungiyar kare hakkin jama'a ta Amirka, ta ce tun a watan Nuwamban 2022 aka kama ma'auratan Amir Mohammad Ahmadi mai shekaru 22 da Amaryarsa Astiyazh Haghighi mai shekaru21 bisa zargin saba dokokin shari'a na yin rawa babu lullubi a bainar jama'a.

Tun a tsakiyar watan Satumban shekara ta 2022, matasa na ta gudanar da zanga-zangar adawa da tsauraran dokokin gwamnati a Iran, bayan mutuwar wata matashiya mai suna Mahsa Amini a hannun 'yan sanda bayan da aka tsare ta kan saba ka'idar sa sutura ta addini.