Malala Yousufzai matashiyar 'yar fafutikar ganin yara mata sun je makaranta a Pakistan ta sanar wa duniya labarin auren ta da Angonta mai suna Asser Malik, an wayi garin wannan Laraba da sakon da ta wallafa a shafinta na twitter inda miliyoyin mabiyanta suka yi ta taya ta murna.

Malala ta fito idon duniya a shekarar 2012  bayan da ta tsallake rijiya da baya, a lokacin da wasu 'yan Kungiyar Taliban suka yi yunkurin kashe ta, bayan da suka harbeta da bindiga a ka, an yi nasarar ficewa da ita daga kasar Pakistan zuwa birnin Landan na kasar Birtaniya inda aka yi ma ta magani, sai dai ta ci gaba da zama a can a sakamakon barazanar da ta ke fuskanta daga Taliban da sauran kungiyoyi da ke adawa da ilimin Boko.

Yar asalin kasar Pakistan mai shekaru 24 da haihuwa, ta kasance yarinya mafi karancin shekaru da ta karbi lambar yabo ta Nobel. Ta shahara a duniya inda ta ke ci gaba da gwagwarmayar ganin an bai wa kowacce 'ya mace damar samun ilimi.