Ma'aikatar harkokin wajen Faransa ta tabbatar da sakin jami'in, wanda ya shafe kusan shekara guda a tsare a Mali.

Fadar shugaban Mali ta ce afuwar ba ta nufin an wanke Vezilier daga tuhumar da ake masa, tana mai umurtar shi da ya fice daga kasar nan take.

An kama Vezilier ne a ranar 13 ga Agustan 2025 tare da wasu jami'an sojin Mali, bisa zargin hannu a wani shiri na kitsa makarkashiya ga gwamnati.

Sakin nasa dai wani mataki ne da ba kasafai ake gani ba tsakanin Mali da Faransa, bayan shafe shekaru ana samun takun saka a dangantakar kasashen biyu.