Shugaba Abdel Fattah Al Sisi na kasar Masar, ya ayyana dokar ta-baci na watanni uku a kasar, bayan hare-haren boma-bomai kan wasu majami'u biyu na kasar a jiya Lahadi. Shugaban na Masar ya sanar da dokar ta-bacin ne cikin jawabin da ya yi bayan ganawa da majalisar tsaro.

Hare-haren da kungiyar IS ta dauki alhakin kaddamar da su a biranen Tanta da kuma Alexandria, sun haddasa asarar akalla rayuka 44 na mabiya addinin Kirista da ke ibada a majami'un. Dokar dai yanzu ta kara wa jami'an tsaron kasar karfin gudanar da bincike da kuma kame ba tare la'akari da 'yancin zirga-zirga yadda aka saba ba.

Dama dai wani bangaren da kungiyar ke da karfi cikinsa a kasar, na karkashin wannan dokar. Kasar ta Masar dai ta sha fuskantar makamancin wannan matakin na tsawon shekaru, sai dai tsohon shugaba Mohamed Morsi ya cire shi cikin shekarar 2012.