Jagorar adawar Venezuela, Maria Corina Machado, wadda ta lashe kyautar Nobel ta Zaman Lafiya ta bana, ta ce dole kasashen da ke bin tsarin dimukuraɗiyya su shirya domin kare 'yancinsu, saboda ci gaban al'ummominsu.

Ta bayyana haka ne cikin wani jawabi da 'yarta, Ana Corina Sosa Machado, ta karanta a birnin Oslo, inda ta karbi lambar yabon a madadin mahaifiyarta wadda ba ta samu halarta ba.

Machado mai shekaru 58, ta ce wannan lambar yabo tana da muhimmanci ba ga kasarta kadai ba, har ma ga duniya baki daya, domin tana tunasar da duniyar cewa dimukuradiyya muhimmin ginshiƙi ne ga zaman lafiya.

Tun daga ranar 9 ga Janairun wannan shekarar, Maria Corina Machado  ba ta bayyana a bainal jama‘a ba, bayan da aka cafke ta na dan lokaci yayin da ta halarci wata zanga-zanga tare da magoya bayanta a Caracas babban birnin Venuzuela.