Mayakan IS sun bayyana cewa sun halaka dakarun sojan Najeriya 30 a wani hari da suka kai a ranar Asabar a jihar Borno da ke Arewa maso Gabashin Najeriya, ikirarin da dakarun sojan na Najeriya suka karyata.

A cewar mai magana da yawun dakarun sojan na Najeriya harin da aka kai kan sojan kasar a kauyen Logomani a ranar Asabar dakarun sun kori mayakan na Boko Haram sai dai sojoji takwas sun samu raunika, babu kuma wani rauni da ke zama barazana ga rayuwar wani daga cikin sojojin.

A wani sako da mayakan na IS suka fitar ga kafar yada labarai a ranar Lahadi sun ce su ke da alhaki na kai harin da aka kai a Lomani. Mayakan na IS dai reshen Afirka ta Yamma (ISWA), wadanda suka raba Boko Haram gida biyu a 2016 sun kai hare-hare a watannin baya-bayan nan a Arewa maso Gabashin Najeriya.