Majalisar Dinkin Duniyar ta bukaci kasashen biyu da su kauce wa daukar wani mataki dangane da matsayin yankunan biyu da ake rikici a kansu.

Sakatare Janar na Majalisar Dinkin Duniyar Antonio Guterres, ya nuna damuwa kan rahotannin da suka bayyana matsayi da Indiya ta dauka a kan yankin Kashmir.

A cewar Mr. Guterres yin hakan ka iya janyo tabarbarewar yanayi na take hakkin bil adama a yankin.

Tun da fari dai Firaministan Indiya Narendra Modi ya ce an dauki matakin raba yankin Kashmir da kwarya-kwaryar 'yancin cin gashin kai ne saboda raba shi da matsalolin ta'addanci da kuma ci gaba da zama saniyar ware.

A jawabinsa na farko bayan daukar matakin, Firamnista Narendra Modi ya ce gwamnati ta yi wani abin tarihi a shawarar da ta yanke.

Rayuwar miliyoyin al'umar yankin da ya fi rinjayen musulmi a Indiyar, ta shiga garari ne bayan matakin janye matsayi na musamman da suke da shi na kwarya-kwaryar 'yancin cin gashin kan da mahukuntan na Indiya suka yi.