Gidauniyar Taimakon Kananan Yara ta Save the Children ta ce, mawuyacin halin da kananan yara ke ciki a Zirin Gaza na Falasdinu ya kai makurar da ko kuka ba sa iya yi saboda rashin kuzari.
Kananan yaran Zirin Gaza na ci gaba da galabaita saboda yunwaHoto: Moaz Abu Taha/APA Images/ZUMA/picture alliance
Talla
Babban jami'in yada labarai na gidauniyar ta Save The Children Dan Stewart ne ya bayyana a lokacin da yake tattaunawa da tashar DW a Zirin Gaza. Wannan dai na zuwa ne, a daidai lokacin da dakarun sojan Isra'ila ke ci gaba da yi wa yankin luguden wutar bama-bamai a kokarin da suke na mallake yankin baki-daya. Bugu da kari gidauniyar ta Save The Children ta koka da karancin kayan agaji da take fuskanta tsawon watanni, inda manyan motocinta 45 makare da kaya ke makale a kan iyaka sanadiyyar tarnakin da Isra'ilan ta yi wa duk wani yunkurin isar da su Gaza.
Gaza: Idan kida na tashi, sai a manta da yanayin yaki
A cikin buraguzan gine-ginen Zirin Gaza, matasan makada na rike da jita da sauran kayan kida. Suna samar da yanayi na fata da martaba, a daidai lokacin da ake fama da yunwa da rashi da kuma cutar tsananin firgici.
Hoto: Dawoud Abu Alkas/REUTERS
Hada hannu waje guda, domin yakar firgici
Kwalejin Gaza, makaranta a birnin Gaza. Harsashi ya farfasa bangon gine-ginen gidaje, yayin da tagogi suka tarwatse. A nan yara mata uku tare da namiji guda na zaune suna koyon kada jita, tare da malaminsu Mohammed Abu Mahadi. Malaminsu ya yi imanin kida zai taimaki lafiyar kwakwalen mazauna Zirin Gaza, daga firgicin tashin bama-bamai da zafin ciwuka da yunwa da rashin 'yanci.
Hoto: Dawoud Abu Alkas/REUTERS
Ci gaba da koyarwa
A farkon shekara ta 2024, Ahmed Abu Amsha malami ne da ke koyar da kidan jita da sauran kayan kida, ya kasance guda daga cikin malaman farko cikin malamai da daliban makarantar koyon kida ta Edward Said National Conservatory of Music da suka fara bayar da darasin koyon kida a yankin kudancin Gaza da yaki ya dai-daita. A yanzu ya sake komawa yankin arewacin birnin Gaza da zama.
Hoto: Dawoud Abu Alkas/REUTERS
'Kida na sanya mini kyakkyawan fata'
"Kida na sanya mini kyakkyawan fata da rage min firgici," a cewar Rifan al-Qassas mai shekaru 15 a duniya da ta fara koyon kidan (oud) wato jita ta gargajiya ta Larabawa tun tana shekaru tara. Al-Qassas na fatan kada jitarta a kasar waje. Al'umma na cikin fargabar kora daga Gaza, saboda matakin majalisar zartaswar Isra'ila na ranar takwas ga watan Agustan 2025 na kwace iko da yankin Zirin Gaza.
Hoto: Dawoud Abu Alkas/REUTERS
A cikin mafi munin yanayi
A gaban tantin malaman da ke koyar da kidan, akwai baraguzan gine-gine da suka rushe a birnin Gaza. Kusan gaba dayan al'ummar yankin na cikin tantunan gaggawa ne. Akwai karancin abinci da tsabtataccen ruwan sha da magunguna. Dalibai da malamansu na ba su da karsashi saboda yunwa. Wasunsu da kyar suke samun damar zuwa azuzuwansu.
Hoto: Dawoud Abu Alkas/REUTERS
Wani abu mai kyau da zai sassauta radadin mutuwa da wahalhalu
Bafalasdine Youssef Saad tsaye tare da jitarsa, a jikin ginin makarantar da yaki ya tarwatsa. Kayan kida kalilan ne suka tsira a rikicin. Tuni Youssef da ke da shekaru 18 a duniya, ke da babban fata: "Ina fatan zan iya koyar da yara kida, ta yadda za su ga haske duk da yanayin yaki."
Hoto: Dawoud Abu Alkas/REUTERS
Lokacin nuna basira
Duk mummunan yanayin da ake ciki, koyon kada kayan kade-kade na samun halartar 'yan kallo. Cikin tanti, daliban da ke koyon kidan na nuna kwarewarsu, yayin da 'yan kallo ke tafa musu. Kayan kidan na tashi, inda suke cimma dogon zango yayin da aka kada su. Mai shekaru 20 da ke koyon kidan jita ya bayyana cewa: "Ina son sanin sababbin salon kade-kade, musamman mai karfi, ina son kida mai amo.
Hoto: Dawoud Abu Alkas/REUTERS
Lokacin farin ciki
Waka ma na taka muhimmiyar rawa. Yadda muryoyin yaran ke tashi na da dadin sauraro, sabanin karar abubuwa masu fashewa da bama-bamai da ke yin kisa da al'ummar yankin Zirin Gaza suka saba ji yau da kullum.
Hoto: Dawoud Abu Alkas/REUTERS
Kida domin magance ciwo
Osama Jahjouh na busa sarewa da ake amfani da ita a kade-kaden Larabawa da Iraniyawa da kuma Turkawa. ya ce: "Wasu lokutan ina dogaro da salon horon numfashi ko kuma in zauna shuru ina busawa, idan karar habe-harbe da tashin bama-bamai suka yawaita. Idan ina yin busa, ina jin kamar zan iya sake yin numfashi, kamar sarewar na magance min ciwon da nake ji a cikin jikina."
Hoto: Dawoud Abu Alkas/REUTERS
Hotuna 81 | 8
A wannan gaba da Isra'ila ke zafafa hare-hare a Gaza, kasashen duniya na ci gaba da kiraye-kirayen ganin ta mayar da wukarta cikin kube albarkacin rayukan jama'a da ake ci gaba da rasawa ba dare ba rana. Jamus na cikin irin wadannan kasashe da ke wannan jan hakali, inda ministan harkokin wajenta Johann Wadephul ya ce kare rayukan fararen hula na zama babban muradin da Jamus ta sa a gaba. A cewarsa wannan mamaya da Isra'ila ke matsa lamba a kokarinta naa aiwatar da ita ba za ta haifar da alheri ba, face kara haddasa asarar rayukan jama'a. Yanzu haka dai al'ummar Gaza na tserewa daga yankin, domin kaucewa zafafan hare-haren Isra'ilan.
