Zakaran duniya kuma wanda ya lashe gasar Copa America har sau biyu Lionel Messi, ya buga wasansa na 208 kuma na karshe tare da tawagar Argentina, a wasan sada zumunta da kasar ta doke jamhuriyar Benin ci 3-0.

A yayin wasan da aka fafata a filin wasa na El Monumental, Messi ya kuma zura kwalonsa ta 126 da tawagar Argentina, sannan ya taimaka an ci kwallo biyu da suka ba wa Albiceleste nasarar a daren Talata.

Filin wasa na El Monumental da ke birnin Buenos Aires, ya yi cikar kwari da dubban masoyan Messi, domin shaida wannan rana mai cike da tarihi. 

Bayan tashi daga wasan Messi, ya bayyana cewa ''taka wa Argentina leda ya kasance babban abin alfahari a gare shi'', sannan ya yi godiya kan wannan dama da kasar ta ba shi.

Shin ya Argentina za ta kasance bayan Messi?

Messi mai shekaru 39, wanda ya lashe kyautar Ballon d'Or har sau takwas ya shafe shekaru 21 yana taka wa tawagar Albiceleste ta Argentina leda, sannan ya kafa babban tarihi a kungiyar Barcelona.