Jamus ta ce Ukraine za ta galaba kan kutsen Rasha
February 18, 2023![Jamus | Taron tsaro na birnin Muich | Boris Pistorius](https://static.dw.com/image/64752837_800.webp)
A ci gaba da halartar taron tsaro na shekara-shekara da ke gudana a birnin Munchen na kasar Jamus da shugabannin kasashen duniya ke yi, ministan tsaron Jamus Boris Pistorious ya yi gargadin cewar samun nasarar a yakin da Rasha ke yi da Ukraine na nufin ba shi damar mamaye wasu kasashe bayan Ukraine.
Pistorious a jawabinsa ga zauren taron ya bayyana alkawarin da kasarsa Jamus da sauran kawayen Ukraine suka yi na ci gaba da tallafa masu har sai sun kai karshen wannan mamayar duk tsawon lokacin da hakan zai dauka.
Ministan tsaron na Jamus, wanda ya kama aiki a watan da ya gabata ya kara jaddada bukatar kasashen duniya na yin duk mai yiwuwa na ganin Putin bai yi nasara a wannan yakin ba. A farkon wannan makon minista Pistorious ya amincer da karin manyan makamai ga Ukrain domin kare kanta.