Ganawar ta zo ne bayan ambato wasu jami'ai masu jibi da fadar mulkin Rasha ta Kremlin da aka yi suna cewa za su maida birnin Kherson da ke kudancin Ukraine a matsayin wata tunga ta dakarun Rasha.

Babu dai cikakkun bayanai kan abubuwan da manyan jami'an kasashen biyu, da Sergei Shoigu na Rasha da kuma Lloyd Austin na Amirka suka tattauna a kansa.

Sai dai abin da ya bayyana shi ne batutuwan tsaron kasa-da-kasa na daga ciki, da ma batun da ya danganci yakin Ukraine.

Sakataren tsaron Amirka Lloyd Austin, ya jaddada bukatar dorewar sadarwa a tsakaninsu, inda ya yi kiran Rasha da ta kaddamar da shirin tsagaita bude wuta a Ukraine.

Wannan ya zo ne yayin da aka fatattaki dakarun Rasha daga Kyiv babban birnin kasar Ukraine, amma kuwa suke samun galaba a yankunan Dombas da Kharkiv daga kudanci.