Da yammacin jiya asabar ne Paparoman darikar Coptic a Masar wato Pope Shenuda na uku ya rasu, shugaban addinin na Krista marasa rinjaye a Yankin Gabas Ta Tsakiya ya rasu ne yana da shekaru 88 da haihuwa. Cocin na Coptic ta sanar da cewa shugaban ya rasu ne bayan da yayi fama da rashin lafiya na tsawon shekaru da dama, kana kuma ba da dadewan nan ba, ya daina karbar magunguna cutar hantar da ke damun sa. Tuni dai shugabanin kasa da kasa suka fara aikawa da sakonnin ta'aziyya. Shugaba Barack Obama na Amurka, ya mika sakon ta'aziyyar sa zuwa ga iyalan Paparoman wanda ya kwatanta sa a matsayin mai fafutukar ganin an sami zaman lafiya tsakanin addinai ta hanyar tattaunawa. Kawo yanzu dai ba'a riga an fadi lokacin da za'a yi janaizar shugaban addinin wanda aka nada sa a matsayin Paparoma Alexandria a shekarar 1971 ba, kuma har wa yau Limaman Cocin ba su riga sun zabi wanda zai maye gurbin sa ba.

Mawallafiya: Pinado Abdu-Waba
Edita: Zainab Mohammed Abubakar