Sakatare janar na Majalisar Dinkin Duniya Antonio Guterres, ya nuna matukar damuwarsa kan yadda sojojin Myammar suka hallaka fararen hula sama da 20 a kauyen Rakhine.

Karin bayani:Matasan Myammar sun fara tserewa daga kasar don kaucewa aikin soja na tilas

Wasu mazauna garin ne suka tabbatarwa kamfanin dillancin labaran Faransa APF cewa a ranar Litinin kadai sojojin Myammar sun kashe mutane kimanin 33 da suka hada da mata da kananan yara, sannan kuma suka raunata wasu 10, bayan wasu hare-hare da sojojin saman kasar suka kai yankin.

Karin bayani:An mayar da Myanmar saniyar ware a jerin kasashen kungiyar ASEAN

Rikicin dai ya samo asali ne tun bayan da dakarun kabilu masu gwagwarmaya da makamai na Arakan suka farwa sojojin kasar a cikin watan Nuwamban bara, daga nan ne sojojin suka dauki gabaren ci gaba da kai farmaki kauyukan jihar Rakhine, da nufin murkushe masu tawayen.

Tun a shekarar 2021 ne sojoji suka kwace iko da kasar bayan juyin mulkin da ya hambarar da gwamnatin dimukuradiyya.