Kakakin Majalisar Dinkin Duniyar Stephane Dujarric ne ya sanar da hakan, inda ya ce sun cimma yarjejeniya da gwamnatin Azerbaijan domin tura tawagar zuwa yankin da ya ce rabon da majalisar ta shige shi ya kai kimanin shekaru 30. A hannu guda kuma Hukumar Kula da 'Yan Gudun Hijira ta Majalisar Dinkin Duniyar UNCHR ta sanar da cewa kimanin mazauna yankin na Karabakh dubu 89 ne suka tsere zuwa Armeniya, adadin da ta kwatanta da kusan rabin yawan al'ummar yankin baki daya. Hukumar ta UNCHR ta ce tun bayan da kazamin fada ya rincabe a makon da ya gabata, adadin mutanen da ke tserewa daga yankin ya karu kuma akawai fargabar adadin nasu ya kai dubu 120 a 'yan kwanakin da ke tafe.