Sheikh Dahiru Usman Bauchi ya sha gwagwarmayar da'awa tsawon shekaru 80, kasancewar ya fara da'awar tun yana da shekaru 20 a duniya karkashin darikar Tijjaniyya. Ya bayar da gagarumar gudummawa wajen yada addinin Musulunci, ba a Najeriya ba kadai har da wasu kasashen Afirka kamar Senegal da Jamhuriyar Nijar.

Tun bayan sanar da rasuwar shehin malamin, al'umma daga sassa dabam-dabam ke tururuwar shiga jihar Bauchi, domin halartar jana'izarsa. A jihar Kano ana ci gaba da alhinin rayuwar Sheikh Dahiru Bauchin, inda mutane ke bayyana cewa za a jima ana tunawa da gudunmawarsa ga addinin da kuma kyakkyawar mu'amalarsa da mabiya dariku da ma sauran addinai a Najeriyar.

Iyalansa sun tabbatar da cewa ya bar wasiyya babban malamin darikar Tijjaniyya Ibrahim Ibn Saleh al-Hussaini da aka fi sani da Shaykh Sharif Saleh ya sallace shi, inda za a binne shi a wani wuri na musamman da aka ware a Masallacinsa da ke cikin garin Bauchi, tun bayan rasuwar babban dansa Dakta Hadi Dahiru Usman Bauchi a 2005.

Sheikh Dahiru Bauchi yana daga cikin malaman addinin Musulunci a Najeriya da suka bayar da gudummawa wajen hadin kan al'ummar Musulmi tun kafin samun 'yancin kai, wanda hakan yasa yake da mabiya masu yawa a ciki da wajen kasar. Wasu cikin almajiransa daga wasu kasashe kamar Chadi sun taso sun zauna a wajensa, har kuma zuwa yanzu suka zama tamkar 'yan gida.