Da yake yanke hukunci kan ci gaba da tsare Mohamed Bazoum din da iyalansa tun bayan hambarar da gwamnatinsa, alkalin kotun mai shari'a Gberi-Be Ouattara ya bukaci sojojin su gaggauta sakin sa ba tare da wani sharadi ba kana su mayar da doka da oda a kasar ta hanyar mika mulkin ga hannun wanda suka kwace a hannunsa da karfin binidaga. A ranar 26 ga watan Yulin wannan shekara ta 2023 da muke ciki ne dai, sojoji suka yi wa Bazoum juyin mulki suka kuma tsare shi tare da iyalansa. Juyin mulkin sojojin na Jamhuriyar Nijar dai ya sha suka daga al'ummomin kasa da kasa, tare kuma da janyo jerin takunkumai ga kasar da ke zaman guda cikin mafiya talauci a duniya.