Ofishin kula da ayyukan jin kai na Majalisar Dinkin Duniya wato OCHA reshen Yamai ya ce, wadannan mutanen na gudun hijira ne daga tashin hankali da ake alakantawa da mayakan sa-kai a yankin Tillaberi da ke kan iyakar Nijar da Burkina Faso da kuma Mali. Hukumar ta ce fiye da mutane dubu takwas da 430 ne suka fake a garin Ouro Gueladjo, kana kimanin dubu biyu da 140 kusa da Torodi yayin da wasu 215 suka isa Yamai babban birnin kasar. Kaurar dai na da nasaba da harin da aka kai wasu kauyuka guda uku da daren ranar uku ga watan Yulin da muke ciki, inda aka kashe mutane biyu baya ga wa'adin kwanaki uku da maharan suka bai wa mazauna kauyukan da su fice daga gidajensu. Majiyoyin yankin sun ce mutane da yawa na kwana a azuzuwan makaranta.