Sojojin da suka kwace mulki a hannu gwamnatin fararar hula sun zargi gwamnatin Faransa da sakin 'yan ta'adda da ake tsare da su, wadanda ke da hannu cikin matsalar tsaron da kasar ke fama da ita fiye da shekaru takwas. A cikin sanarwar da jagororin sojin suka fitar, sun ce 'yan ta'addan sun shirya kai hari kan sansanonin soji da ke kan iyakar Nijar da kasashen Burkina Faso da kuma Mali.

Sanarwar ta kuma bukaci hukumomin tsaro su kasance cikin shirin ko ta kwana yayin da suka bukaci jama'a su sanya ido kan lamuran da ke wakana a cikinsu.

Majalisar mulkin sojin Nijar din ta kuma zargi Faransa da keta sararin samaniyarta da jirgin yaki daga Chadi, wanda hakan ya saba wa dokar rufe sararin samaniyar Nijar din. Sai dai kuma gwamnatin Farasar ta musanta dukannin zarge-zargen.