Moroko dai ta dauki wannan matakin ne, sakamkon sabon nau'in corona na omicron da ke yaduwa tamkar wutar daji a duniya. Hukumar kula da filayen jiragen sama ta kasar ce tabayyana hakan, inda ta ce ta dakatar da duk wani jirgin fasinja na kasa da kasa da zai sauka ko kuma ya tashi daga kasar har sai nan da ranar 31 ga watan Janairun shekara ta 2022 da ke tafe. Mahukuntan na Rabat sun fara sanya wannan dokar ne a karshen watan Nuwambar da ya gabata, inda a baya suka shirya dage ta a ranar 31 ga wannan wata na Disamba da muke ciki. Sai dai kuma sun amince da bai wa jiragen da ke zuwa domin debe 'yan kasarsu daga kasar, damar kwashe al'ummominsu.