Shugaban yankin Gennady Lakhuta ne ya tabbatar da hakan, inda ya nunar da cewa sojojin sun mamaye baki dayan birnin na Kherson da ke da yawan mutane dubu 290 kana ba shi da nisa da yankin Crimea da yanzu haka yake karkashin ikon Rasha. Birnin na Kherson dai na zaman birni na farko da Rashan ta kwace iko da shi, tun bayan kutsen da ta yi a Ukraine. Rahotanni sun nunar da cewa an lalata manyan gine-gine a birnin, yayin da Rashan ke ci gaba da jefa bama-bamai a Kiev fadar gwamnatin Ukraine din.