Rahotanni sun nunar da cewa dakarun sojojin Najeriyar sun yi wa 'yan bindigar kawanya ne a maboyarsu da ke Dajin Makuku da kuma Dirin Daji,, inda kuma suka samu nasarar ceto daliban. Har lokacin hada wannan rahoton dai, DW ba ta shaida dawowar yaran ba. Tuni dai iyayen yaran ke ta bayyana fatan da suke da shi ga 'ya'yansu. Kawo yanzu dai bayan rufe makarantar, ba a iya tantance iya adadin daliban da 'yan bindigar suka tafi da su ba, a cewar shugaban makarantar. Kokarin jin ta bakin hukumomin tsaro a jihar Kebbi bai yi nasara ba. A cewar kwamishiniyar shari'a ta jihar, Ramatu Adamu Gulma a watannin baya jihar ta aiwatar da wata doka ta hukunta masu garkuwa da mutane.