Rikicin ya barke ne a ranar Juma’a bayan sabanin da ya shiga tsakanin wani makiyayi dan kabilar Kreda, wanda ya kai shanunsa shan ruwa a wani tafki, da wani dan kabilar Kuka. Wani dan majalisar yankin ya shaida wa kamfanin dillancin labarai na AFP cewa makiyayin ya harbi dayan mutumin a kafa, lamarin da ya haddasa musayar wuta tsakanin al’ummomin biyu.

Hukumomi sun ce an shawo kan lamarin kuma tuni aka kama mutum 39 tare da kai su babban birnin kasar, N’Djamena.

Ana yawan samun rikice-rikice kan ruwa da filaye da dabbobi a Chadi, wadda Majalisar Dinkin Duniya ta ce tana cikin kasashen Afirka da suka fi fuskantar barazanar sauyin yanayi.