A ranar (30-11-2023) ake bude taron Majalisar Dinkin Duniya karo na 28 kan sauyin yanayi a Hadaddiyar Daular Larabawa, a Dubai. Wannan taro na zuwa ne a daidai lokacin da ake kara fuskantar sauyin yanayi a duniya. Misali a Jamhuriyar Benin ruwan teku na ci gaba da mamaye kasa da ma wasu yankunan amma kuma har yanzu kasashen duniya sun gaza cimma matsayi  akan sauyin yanayi.

Teku na zaizaye kasa tare mamaye filayen noma wani abin fargaba ga duniya

 A gefen gabar tekun Benin,toroko na ruwan teku na cinye ƙasa ba tare da gajiyawa ba. Kasar ta kashe biliyoyin kudi na CFA a cikin 'yan shekarun nan don tabbatar da ganin cewar ta kiyyaye al'umma amma har yanzu abin ya gagara Raymond Mekpé, wani masunci ne: ''A da ruwan tekun ba nan suke ba suna can baya amma rashin kulawa ya sa da sannu a hankali tekun na ci gaba. Kowace rana, tana ci gaba da cinye kasa har ma da dukiyoyi da kadarori na gwamnati da na  sauran jama'a.

A ciki shekaru 21 Benin ta tafka mumunar asara da ba ta da misali

Tun daga shekara ta 2002, Benin ta yi hasarar daruruwan kilomita na kasa da teku ta mamaye, a cewar masanin ilimin teku Cossi Georges Dêgbé: ''Idan ba a yi wani abu ba, a cikin ƴan shekaru za mu rasa hanyar da ta hada tsakanin Cotonou da Porto-Novo ruwan teku zai mamayeta. Ba ma son hakan. A kwai bukatar dauki matakan kandgarki."

Benin ta kashe makudan kudade domin shawo kan lamarin amma har yanzu abin ya gagara

 Kusan kudin CFA biliyan dari ne aka zuba  a cikin 'yan shekarun nan,domin yakar wannan bala'i sai dai Alain Tossounon, shugaban cibiyar sadarwa  ta fafufukar kare,muhalli da kuma yanayi ya ce waɗannan ƙoƙarin bai isa ba: "Dole ne a yau mu shigar da wannan al'amari cikin dukkan ayyukan da mu ke gudanarwa. Kuma mun yi imani,a  matsayinmu na kwararru, cewa a yau kokarin da ake yi bai wadatar ba kuma har yanzu al'umma ba su fahimci illar lamarin ba." Masana na cewar akwai fargaba a duniya a kan garuruwan da ke bakin teku wanda wata rana za a wayi gari ruwan tekun ya cinyesu duk wannan a kan sauyin yanayi, wanda har yanzu ksashen duniya ke yin tababa wajen cika alkarin da aka dauka tun a taron COP21 na yarjejeniyar Paris da aka cimma a shelara ta  2015.