Ma'aikatar man fetur din kasar ta Libiya ta sanar da cewa tuni wani jirgin ruwan dakon danyen man da ya kamata ya soma aikin jigilar man ya dire a gabar tekun al-Sedra mai albarkatun danyen mai a yankin gabashin kasar.

Sai dai rahotanni sun ce duk da sake dawowa da hada-hadar aikin danyen man, kasar ta Libiya za ta shafe tsawon lokaci kafin ta kai ga samar da ganga miliyan daya da digo biyu na danyen mai a kowace rana kamar yadda aka saba, duba da mummunar illa da ma koma bayan da kamfanin hakar man fetur din kasar ya fuskanta sakamakon tashe-tashen hankulan.