Wani likita dan kasar Ruwanda na shirin fuskantar shari'a a birnin Paris na Faransa, sakamakon tuhumarsa da hannu a kisan kiyashin da aka yi a kasarsa.
Gidan adana kayan tarihi na tuna wa da kisan kiyashin da ak yi a RuwandaHoto: Hatim Kaghat/Belga Mag/AFP/Getty Images
Talla
Duk da cewa wannan likita ya musanta zargin da ake masa dai, amma wadanda suka gabatar da karar sun ce suna da kwararan hujjoji a kansa. Ranar shida ga Afrilun 1994 ta kasance wani lokaci mai ban tausayi ga tarihin kasar Ruwanda, saboda an harbo jirgin shugaban kasa na wancan lokaci Juvénal Habyarima a kan hanyarsa ta dawowa daga makwabciyar kasar Tanzaniya. Dukkan fasinjojin da ke cikin jirgin ciki har da shugaban Burundi Cyprien Ntaryamira sun mutu.
Har yanzu ba a san ko su wane ne ke da alhakin wannan aika-aika ba, sai dai ana kallon lamarin a matsayin tushen kisan kiyashin da ya halaka mutane tsakanin dubu 500 zuwa miliyan daya. Shi dai Shugaba Habyarima dan kabilar Hutu ne da ke da rinjaye, wadanda suka zargi tsirarun 'yan kabilar Tutsi da kai harin. Kuma jim kadan bayan harin ne, aka fara kashe dimbin 'yan kabilar ta Tutsi da ma 'yan Hutu masu sassaucin ra'ayi. A garin Butare dai, an fara kashe-kashen ne kimanin makonni biyu bayan kashe shugaban kasar, inda aka kiyasta cewa an kashe fiye da mutane dubu 200.
Kwanaki 100 na kisan kare dangi a Ruwanda
Har yau kisan kare dangi da aka yi a Ruwanda shekaru 25 da suka wuce, yana daukar hankalin duniya. A 1994 gamaiyar kasa da kasa musamman Majalisar Dinkin Duniya da kasar Faransa sun juya wa al'ummar Ruwanda baya.
Hoto: Timothy Kisambira
Alamun tsattsauran ra'ayi
Ranar 6 ga watan Afrilun 1994 wadanda ba a sani ba suka kakkabo jirgin saman da ke dauke da shugaban Ruwanda Juvenal Habyarimana lokacin da yake kokarin sauka a filin saukar jiragen saman birnin Kigali. Shugaba Habyarimana da takwaransa na Burundi sun mutu a harin. Kwana guda bayan haka aka fara kisan da aka tsara. An ci gaba da kisan kare dangin inda cikin watanni uku aka hallaka mutane 800,000.
Hoto: AP
Kisa da nufi
Bayan hallaka shugaban, 'yan Hutu masu matsanancin ra'ayi sun kai hari kan tsirarun 'yan Tutsi da Hutu masu sassaucin ra'ayi. Wannan kisa ne da aka shirya a kan 'yan fafutuka, da 'yan jarida da 'yan siyasa. Daya daga cikin wadanda aka fara kashewa ranar 7 ga watan Afrilu ita ce Firaminista Agathe Uwiringiymana.
Hoto: picture-alliance/dpa
Ceto 'yan kasashen ketare
Ana kashe dubban 'yan Ruwanda kowace rana, sojoji musamman na Beljiyam da Faransa sun kwashe 'yan kasashe ketare kimanin 3,500. Ranar 13 ga watan Afrilu sojojin Beljiyam sun ceci ma'aikata bakwai Jamusawa da ke aiki da tashar Deutsche Welle mai yada shiri daga Kigali. Ma'aikata 'yan kasar Ruwanda 80 kacal daga cikin 120 ne suka tsira daga kisan kare dangin.
Hoto: P.Guyot/AFP/GettyImages
Kira kan neman taimako
A farkon watan Janairun 1994 shugaban dakarun kiyaye zaman lafiya Romeo Dallaire ya nemi daukar mataki kan labarin da ya samu na shirin hallaka 'yan Tutsi. Amma sakon gargadin da ya tura wa Majalisar Dinkin Duniya ranar 11 ga watan Janairu an yi biris da shi. Kofi Annan karamin Sakatare Janar na Majalisar Dinkin Duniya mai kula da tsari ya yi watsi da maganar yuwuwar kisan kare dangin.
Hoto: A.Joe/AFP/GettyImages
Sakonnin tsana na kafofin yada labarai
Gidan rediyon RTLM da Kangura da wata mujalla mai fitowa mako-mako cike suke da sakonnin tsana na kabilanci. A shekarar 1990, Kangura ta buga wasu ka'idoji 10 na Hutu, rediyon RTLM ya yi suna wajen kade-kade da labarin wasanni, da kuma ziga 'yan Hutu su hallaka 'yan Tutsi marasa rinjaye. Daraktanta Milo Rau ya sadaukar da kai wajen tsara fim na "Tsanan Rediyo"
Hoto: IIPM/Daniel Seiffert
'Yan gudun hijira a otel
A birnin Kigali, Paul Rusesabagina ya boye fiye da mutane 1,000 a otel mai suna "Hotel des Milles Collines". Rusesabagina ke zama manajan otel din na dan kasar Beljiyam wanda ya bar kasar. Sakamakon amfani da kudi da giya, ya taimaka wajen kare 'yan Hutu masu matsanancin ra'ayi daga kisan 'yan gudun hijira. A wurare masu yawa 'yan gudun hijira ba su tsira ba.
Hoto: Gianluigi Guercia/AFP/GettyImages
Kisan kare dangi a mujami'u
Mujami'u ba su zama tudun na tsira ba. Kimanin mutane 4,000 maza da mata da kuma yara aka hallaka da adduna da wukake a mujami'ar Ntarama da ke kusa da birnin Kigali. Yau wannan mujami'a ta kasance daya daga cikin wuraren da ake tunawa da kisan kare dangi. Akwai kasusuwan kawuna da jikin mutane a bango da ke tunatar da abin da ya faru.
Hoto: epd
Rawar da Faransa ta taka
Faransa tana da hulda ta kut-da-kut da gwamnatin Hutu. Lokacin da sojojin Faransa suka shiga a watan Yuni, sojojin da tsagerun da suke da hannu wajen kisan kare dangi sun tsere zuwa kasar Zaire, wadda yanzu ake kira Jamhuriyar Demokaradiyyar Kwango, tare da makamansu. Sun ci gaba da zama barazana ga Ruwanda.
Hoto: P.Guyot/AFP/GettyImages
Dafifin 'yan gudun hijira
Lokacin kisan kare dangin, miliyoyin 'yan Ruwanda 'yan Tutsi da Hutu sun tsere zuwa kasashen Tanzaniya da Zaire da kuma Yuganda. Miliyan biyu sun shiga Zaire kadai. Wadannan sun hada da tsaffin sojoji da wadanda suka shirya kisan kare dangi, inda suka kafa kungiyar Democratic Forces for the Liberation of Rwanda (FDLR), wadda take cin zarafin fararen hula a gabashin kasar Kwango.
Hoto: picture-alliance/dpa
Kama babban birni Kigali
Ranar 4 ga watan Yulin 1994 kungiyar Rwandan Patriotic Front (RPF) ta fara sintiri a yankin mujami'ar "Holy Family" a birnin Kigali. Zuwa lokacin da kungiyar ta karbe iko a mafi yawan kasar ta kawo karshen kisan kare dangi. Amma kungiyoyin fafutuka sun zargi 'yan tawayen da aika laifuka, sai dai babu wanda aka tuhuma har yanzu.
Hoto: Alexander Joe/AFP/GettyImages
Karshen kisan kare dangi
Ranar 18 ga watan Yulin 1994, shugaban RPF, Manjo-Janar Paul Kagame ya bayyana kawo karshen fada da dakarun gwamnati. 'Yan tawaye sun kwace babban birnin kasar da sauran manyan birane. Da farko sun saka gwamnatin riko. Daga bisani Paul Kagame ya zama shugaban Ruwanda a shekara ta 2000.
Hoto: Alexander Joe/AFP/GettyImages
Tabon karshe
An kwashe kimanin watanni uku ana kisan kare dangi. An yi amfani da adduna wajen yanka mutane. Mutane sun hallaka makwabta. Yara da tsofi ba su tsira ba, gawauwaki sun mamaye kan tituna da sauran sassan jikin mutane. Ba wadannan abubuwan ba ne kawai ke tunatar da mutane kisan kare dangin Ruwanda. Akwai kuma tunani.
Hoto: Timothy Kisambira
Hotuna 121 | 12
Sosthène Munyemana mai shekara 68 kuma dan kabilar Hutu na aikin likitan mata a asibitin kwararru na garin Butare, amma a cewarsa, ya yi gudun hijira a tsakiyar watan Yuni zuwa Jamhuriyar Dimukuradiyyar Kwango sannan ya tafi Faransa yana rayuwa da 'ya'yansa uku. A yanzu dai, ana tuhumar likita Munyemana da hannu a kisan kare dangi da kuma cin zarafin dan Adam. An ce ma ya rattaba hannu a kan budaddiyar wasikar goyon bayan gwamnatin rikon kwarya tare da wasu jiga-jigan yankin da ke hannu dumu-dumu a kisan kare dangin, sai dai lauyansa Jean-Yves Dupeux ya yi watsi da wadannan zarge-zargen yana mai cewa bita da kullin siyasa ne.
Amma alkaliya Aurélia Devos da ta saba jin wannan muhawara saboda ta yi aiki na tsawon shekaru 10 a matsayin shugaban sashen aikata laifukan kare dangi da laifukan yaki a ofishin mai gabatar da kara na Paris da aka kafa a shekarar 2012, ta ce dukkan wadanda ake tuhuma a gaban kotun kasa da kasa kan laifuka kisan kare dangi na da irin wannan hujja. Shi ma Alain Gauthier da ya kafa kungiyar masu shigar da kara ta kasar Ruwanda (CPCR) wacce ke wakiltar masu kara 25 a shari'ar, ya nuna shakku kan hujjar matsin lambar siyasa. Ana sa ran bayyana hukuncin shari'ar da ake wa Dr Sosthène Munyemana kan hannu a kisan gillar Ruwandan, a ranar 19 ga watan Disamban da ke tafe.
