Iyalan fasinjojin jirgin Malesiya na jiran tsammani
March 8, 2015![Iyalai na sanya hannu akan hoton jirgin Malesiya da ya bace](https://static.dw.com/image/18302232_800.webp)
Razak wanda ya yaba wa tawagar da ke laluben jirgin saman mai ɗauke da mutane 239, ya ce yana da kyakkyawan fatan cewar za a gano shi. Wannan na na zuwa ne a dai-dai lokacin da Firaministan Ostreliya Tony Abbott wanda ƙasarsa ke jagorantar binciken ke cewa akwai yiwuwar su ƙara faɗaɗa bincikensu in har ba a cimma nasara ba cikin sakamakon binciken da suke da shi a hannu a yanzu haka. In dai ba a manta ba jirgin saman kirara Boing 777 mai lamba MH370 ya ɓace ne a ranar takwas ga watan Maris ɗin shekarar da ta gabata ta 2014 ɗauke da mutane 239 a kan hanyarsa ta zuwa Beijing na ƙasar China daga birnin Kuala Lumpur na Malesiyan. A wannan Lahadin ne dai za a fitar da rahoton binciken da aka gudanar dangane da ɓacewar jirgin, da ake kyautata zaton ya faɗa a tekun Indiya.