Shugaba Biden na ziyara a Kyiv
February 20, 2023![Shugaban kasar Amirka Joe Biden tare da shugaban kasar Ukraine Volodymyr Zelensky](https://static.dw.com/image/64762623_800.webp)
A lokacin da yake ganawa da shugaban Ukraine Volodymyr Zelensky, shugaba Biden ya tuna irin fargabar da ake da ita a shekarar da ta gabata, na yiwuwar Rasha ta karbe ikon babban birnin Ukraine, sai dai a cewarsa har yanzu Kyiv na tsaye da kafafunta. Shugaba Biden ya kuma kara jadadda irin goyon bayan da Amirka ke bai wa Ukraine ya na mai cewa, Amirkawa na tare da su kana duniya ta na tare da su.
Shugaba Biden ya kuma sanar da karin tallafin dala miliyan 500 ga Ukraine baya ga wanda Amirka ta sanar da bayarwa a baya, wadanda suka hada da manyan tankokin yaki da kuma makaman kare kai daga hare-hare. Ziyarar ta shugaban Amirka, ta na zuwa ne yayin da shugaba Zelensky ke matsa lamba ga kawayensa kan gaggauta tura masa karin tallafin makamai da ma jiragen sama na yaki.