Shugaba Joe Biden na kasar Amurka, ya kamu da kwayar cutar Corona kamar yadda fadar White House ta tabbatar.

Shugaban na Amurka Biden wanda da ma ke yakin zabe a Nevada,  ya katse jawabinsa a lokacin wani taro kan kare hakkin 'yan yankin Latino.

Fadar ta White House dai ta ce, Shugaba Biden ya nuna alamun cutar da su ne suka tabbatar da cewa ya kamu, sai dai ba su yi tsanani ba.

Yanzu dai Mr. Biden zai ci gaba da gudanar da aikinsa na gwamnati ne daga gidansa da ke a Delaware.

Shugaban kasar ta Amurka mai shekaru 81 da haihuwa na kokarin nuna wa masu sukar karsashinsa a yanzu wadanda ke shakkun ko zai iya fafatawa da babban abokin hamayyarsa tsohon Shugaba Donald Trump a zaben kasar da za a yi cikin watan Nuwamba.

Ya dai nace kan cewa zai ci gaba da takarar duk da kiraye-kirayen janyewa da ake yi masa a ciki da ma wajen jam'iyyarsa ta Democrats.

Wannan dai wani kalubale ne ga Shugaba Joe Biden a siyasance.