Mahukuntan Rasha sun tabbatar da cewa sojojin kasar 498 suka halaka sakamakon kutsen da suka kaddamar a kan Ukraine, kuma wannan shi ne karo ana farko da kasar ta fitar da alkaluman tun lokacin da Shugaba Vladimir Putin na kasar ta Rasha ya ba da umurnin kutsen a makon jiya.

A cikin wata sanarwa da ya karanta Igor Konashenkov mai magana da yawun ma'aikatar tsaron kasar ya ce sojojin Rasha kusan 500 sun gamu da ajalinsu, yayin da wasu 1,597 suka jikata sakamakon fafatawa da suke ci gaba da yi a kasar Ukraine mai makwabtaka.