A wata sanarwa da sojojin suka wallafa a shafin sadarwa na X, sun bayyana samun gagarumin nasara inda suka ce ko baya ga hallaka mayakan da dama, sun kuma lalata wata maboya da suke kera makamai tare da kona wurin kurmus.

Harin da suka ce ya kaisu ga neman wani shugaban 'yan ta'addan ruwa a jallo, da ya addabi yankin arewacin Tombouctou.

Mali na daga cikin kasashen yammacin Afirka da suka kwashe sama da shekaru 10 suna fama da matsalolin tsaro, wanda daga baya ya watsu ya zuwa kasashen Burkina Faso da Nijar.

Rundunar Majalisar Dinkin Duniya ta Minusma wacce ke taimakawa Mali yaki da wadannan mayakan za ta fice daga kasar a karshen wannan shekarar kamar yadda sojojin da ke rike da madafun iko suka bukata.