Kasar Sri Lanka za ta nemi tallafin kudi daga Asusun Bayar da Lamuni na Duniya, IMF. Shugaban kasar Gotabaya Rajapaksa ne ya sanar da haka a wani jawabi da ya yi wa kasar bayan wata gagarumar zanga-zangar da aka yi wa gwamnatinsa kan ci gaba da durkushewa da tattalin arzikin kasar ke yi. Ya kuma bukaci 'yan kasar su tallafa ta hanyar rage amfani da wutar lantarki da man fetur.

Sri Lanka da ke nahiyar Asiya dai ta kwashe makonni tana shaida yawaitar tashin farashin kayan abinci babu kakkautawa, ga kuma karancin man fetur da ya dabaibaye kasar.