Daruruwan masu zanga-zanga a birnin Kabul na Afghanistan sun yi jerin gwanon kira ga Amirka da ta sakar wa kasar kudadenta da ke bankunan ketare da suka kai dala miliyan dubu tara.

 

Masu zanga-zangar rike da kwalaye da aka rubuta '' Ku ba mu kudinmu'' sun tsaya a gaban ofishin jakadancin Amirka da ke Kabul wanda a yanzu yake kulle babu kowa a ciki, suna bukatar Amirka da ta saki kadarorin Afghanistan domin ceto tattalin arzikin kasar da ya shiga mawuyacin hali tun bayan da Taliban ta kwace iko da kasar.

 

Gwamnatin ta Taliban da ta kwace iko a watan Agutsa dai ta kasa samun kudin da za ta biya wa 'yan kasar bukata, lamarin da ya sa gwamnmatin ta talauce, har tafiyar da harkokin gwamnati ke neman zamar mata jidali.