Kungiyar Taliban ta kwace ikon daya daga cikin manyan gundumomin kasar Afghanistan a wannan Juma'a a yayin da ta ke ci gaba da zafafa hare-hare a sassan kasar. Taliban ta kwace iko da babban birnin gundumar Nimroz da ke kudancin kasar jim kadan da halaka shugaban ma'aikatar yada labaran kasar a sakamakon wani munmunan hari da mayakan kungiyar suka kai ma'aikatar.

Taliban ta ci gaba da samun nasarori a yakin da ta ke yi da dakarun gwamnatin kasar, kawo yanzu, kungiyar ta kwace yankunan kasar da dama, da ke da mahinmanci a yayin da ta ke ci gaba da matsa kaimi tare da zafafa hare-hare don kwace ikon kasar baki daya daga hannun gwamnatin.  Dubbai na tserewa daga cikin kasar inda suke neman mafaka a kasashe da ke makwabtaka da Afghanistan. Rikicin kasar ya kazanta bayan da Amirka da kawayenta suka janye rundunarsu da suka tsugunar tsawon shekaru ashirin a cikin kasar.