Mahalalta taron sun kuma tattauna hanyoyin rage fatara da talauci, tare da batun 'yan gudun hijira da samar da kyakkyawan yanayi da zai inganta zamantakewar al'ummar yankin. Sanata Ibrahim Ida shi ne mukaddashin shugaban kungiyar ta Dattawan Arewa ACF, ya kuma bayyana cewa sun tattaru ne da nufin kara kulla dankon zumunci da kuma yin nazari kan muhimmancin da ke tattare da hada kan al'ummar yankin arewacin Najeriya da kuma lalubu mafuta kan manyan kalubalen da suke janyowa Arewa koma-baya a bangaren samar da zaman lafiya da sauran abubuwan da ke hana ruwa gudu a yankin.