Jami'an 'yan sanda a ƙasar Girka suka ce a wannan Alhamis ce suka tsare wani mutum mai shekaru 29 a duniya bayan wani abu ya tarwatse kusa da wani ofishin 'yan sanda a birnin Athens, fadar gwamnatin ƙasar, wanda kuma ya yi sanadiyyar la'la'ta tagogin ofishin 'yan sanda dama na wasu gine-ginen dake yankin da abin ya faru, amma kuma bai janyo rauni ba ga ko da mutum guda. 'Yan sandan suka ce mutumin da ake zargin, ya harba wani abinda ka iya fashewa ne akan ginin caji-ofis ɗin da misalin ƙarfe biyu da rabi (02:30) na dare agogon ƙasar ta Girka. Wannan caji-ofis dai ya taɓa fuskantar harin bindigogi a shekara ta 2009 daga wata ƙungiyar dake da tsattsauran ra'ayin kawo juyin juya halin siyasa a ƙasar, ko da shike kuma a wancan lokacin babu wanda aka tsare bisa zargin yana da hannu wajen aika-aikar.

Mawallafi : Saleh Umar Saleh
Edita : Mohammad Nasir Awal