Shugaban Amirka Donald Trump ya yi wa fursunoni uku 'yan Amirka wadanda Koriya ta Arewa ta sako barka bayan da suka sauka a wani sansanin sojin sama a Washington.  

Koriya ta Arewa ta sako mutanen uku ne kwana daya gabanin lokacin da ake sa ran za ta sako su, abin da fadar Amirka ta White House ta baiyana a matsayin kyakkyawar kudiri na ganawar da ake shirin yi tsakanin Trump da shugaban Koriya ta Arewa Kim Jong Un.

Sakin mutanen uku ya zo ne a daidai lokacin da sakataren harkokin wajen Amirka Mike Pompeo ya kai ziyara kasar domin kammala shirin ganawar shugabannin kasashen biyu da ake shirin za a yi a Singapore a karshen wannan watan ko kuma farkon watan Juni.

Koriya ta Arewa ta zargi mutanen ne da aikin leken asiri.