Galibin al'umma mazauna yankunan karkara dai ba su da masaniya kan dokokin da gwamnati a  Jamhuriyar Nijar ta gindaya dangane da matakan kariya kan wannan cuta, hakan ya sa sarakunan gargajiyar daukar matakin fara fadakar da al'umma mazauna kauyukan da ke karkashinsu kan yadda ya kamata su bi dokokin domin kare kansu da ma sauran mutane.

Hukumomin a da'irar birnin Gayan da kuma sarakunan gargajiyar dai sun tattauna da masu jiragen ruwa da masu sa'nar kabu-kabu domin yi musu gargadi kan bin dokar da kuma kiyayewa da bin hanyoyin ratse na bayan fage don shiga ko fita zuwa cikin wasu kasashe. A wasu unguwanin dai tuni a ka fara tayar da jijiyoyin wuya tsakanin malamai da kuma jami'an tsaro a kan batun yin salla a Masallatai. Daga bangaren masu sana'ar kabu-kabu dai tuni uwar kungiyarsu ta soma daukar matakai na ganin 'ya'yanta sun bi dokar sau da kafa.