'Yan sandan kasar Jamus sun yi nasarar cafke Djaber Albakr da ke zaman dan gudun hijira daga kasar Siriya, wanda kuma suke nema ruwa a jallo tun bisa zarginsa na yunkurin kai wani harin ta'addanci a kasar ta Jamus. Rundunar 'yan sandan ta sanar a shafinta na Twitter inda ta ce: "Ta ji dadi gaya bisa samun nasarar cafke Albakr, aikin na tsahon kwanaki biyu akwai wahala lalle, amma kuma tana mai farincikin sanar da cewa ta yi nasarar kame wanda ake zargin a birnin Leipzig." 'Yan sandan na Jamus dai sun tsunduma neman Djaber Albakr dan kasar ta Siriya mai shekaru 22 a duniya ne, bayan da aka samu tarin wasu ababe masu fashewa a gidansa da ke birnin Chemnitz.