Daya daga cikin shugabanin yan tawaye mai karfin fada a ji a Yemen, ya gargadi shugaba Abdurabuh Mansur Hadi da ya girka sabuwar gwamnati tsakanin kawanaki 10 ko kuma su nada ta su ta aiwatar da irin aiyyukan da suke bukata.

Wasu 'yan tawayen da aka fi sani da Huthi, sun yi amfani da damarda suka samu a sanadiyyar rashin daidaiton da kasar ta soma fiskanta bayan faduwar gwamnatin Ali Abdallah Saleh a shekara ta 2011, suka kama babban birnin kasar na Sana'a ranar21 ga watan Satumba.

Wannan gargadin da aka yi wa Hadi na zuwa ne bayan da shugabanin 'yan tawayen suka gudanar da wani taron da ya sami halartar mafi yawan kungiyoyin 'yan tawayen kasar, da ma wadanda suka goyi bayan tilastawa Ali Abdallah Saleh ya ajiye mukaminsa.

'Yan kungiyar ta Huthi dai sun yi watsi da kiran da shugaba Hadi ya yi ranar lahadin da ta gabata, na cewa su kwance dammara su kuma janye mayakansu daga yankunan da suka kame, a ciki har da Sana'a babban birnin kasar ta Yemen, inda ya zarge su da kuntata wa jama'a a maimakon taimakon da suka ce suna yi