'Yansanda sun tarwatsa matasa masu zanga-zanga a birnin Athens ta ƙasar Girka
May 1, 2010![](https://static.dw.com/image/3856461_800.webp)
'Yansanda sunyi amfani da barkonon tsohuwa domin tarwatsa matasa masu zanga-zanga a birnin Athens na ƙasar Girka a lokacin da ma'aikata dake faretin zagayowar ranar ma'aikata ke wucewa ta gaban ma'aikatan kuɗin ƙasar.
Haka kuma sai da 'yansandan suka harba barkonon tsohuwa akan wasu masu zanga-zanga da suka nemi kai hari wani Otel na alfarma a birnin na Athens.
Anan jamus ma dai an ba hammata iska tsakanin masu zanga-zanga da 'yansanda a lokacin bikin ranar ma'aikata da aka gudanar a birnin berlin.
Kimanin masu zanga-zanga duba ɗaya ne suka ja daga a wani sashe na birnin Berlin domin adawa da 'yan ƙungiyar dake goyon bayan Haramtacciyar jam'iyar NAZI.
A yayinda kuma 'yansanda dubu bakwai ke sintiri a birnin baki ɗaya domin hana ɓarkewar bata kashi tsakanin ɓangarorin biyu.
A birnin Hamburg dake arewacin Jamus 'yansanda sun kame wasu masu tarzoma da suka kai hari akan ofisoshin 'yansanda tare kuma da cinna wuta a guraren zuba shara.
Mawallafi: Babangida Jibril
Edita: Yahouza sadissou Madobi