Zaben da zai gudana a runfunan zabe 35,000 zai fi mayar da hankali ne kan Shugaba mai ci Yoweri Museveni wanda ke dosar shekaru 40 kan madafun iko da kuma Bobi Wine matashin mawaki da ya rikide ya zama gagarabadau din dan siyasa. Mutum miliyan 18 ake sa ran za su kada kuri'a a zaben da ke daukar hankali a ciki da wajen nahiyar Afirka.

Rahotanni sun ce an baza sojoji a manyan titunan birnin Kampala tare da daukar matakan dakile tashin hankali. A Larabar nan  kuma jama'a ta bayar da labarin cewa an katse musu intanet ta yadda shiga shafukan sada zumunta ya koma abu mai matukar wahala. Kafin ranar zaben, al'ummar kasar ta shaida tashin hankali kala-kala a wurin yakin neman zabe.