Shugaba Recep Tayyip Erdogan na kasar Turkiyya a wannan Laraba ya kawar da yuwuwar jinkirta zaben shugaban kasa da aka tsara ranar 14 ga watan Mayu saboda girgizar kasa da aka samu a cikin watan Febrairun da ya gabata.

Yayin jawabi ga 'yan majalisar dokoki na bangaren jam'iyya mai mulki a birnin Ankara fadar gwamnatin kasar, shugaban ya ce mutanen Turkiyya za su yi abin da ya dace ranar 14 ga watan Mayu mai zuwa.

Bayan samun girgizar kasa a kasashen Turkiyya da Siriya an zaci gwamnatin za ta jinkirta zaben na watan Mayu ganin kimanin mutane dubu-45 iftila'in ya halaka a kasar ta Turkiyya, kuma lokacin Shugaba Erdogan ya kafa dokar ta-baci ta watanni uku a yankuna 11 na kasar da aka samu girgizar kasar.