Hukumomi na kudancin jihar Kerala da ke kasar Indiya su ne suka tabbatar da faruwar lamarin a yankin, bayan ruwan sama kamar da bakin masaki da aka yi ta shatatawa.

Sama da mutum 40 dai sun rasa rayukansu ciki har da wani jariri, yayin da wasu da dama ke makale a karkashin kasa.

Jami'an agaji sun bayyana takaicin rashin iya kai agaji cikin lokaci, saboda yankewar da wata muhimmiyar gada da ke gundumar Wayanad ta yi.

Rundunar sojan kasar ta Indiya dai, ta ce ta aike da dakaru 200 zuwa yankin domin taimaka wa jami'an da ke wajen wadanda ke kokari ta fannin dauki ga masu bukata.

Ko a shekara ta 2018 ma dai zaftarewar laka ta kashe akalla mutum 500 a kewayen yankin na Kerala, bala'in da aka bayyana da mafi muni cikin shekaru da dama.